تشطيب شقة العريس

نصيحه لكل شاب

هتتجوز واللي حص حصل وخطبت يبقي اكيد هتشتري شقه و6ايز توضبها خصوصًا إننا بنسمع كل يوم من اللي حوالينا إن التشطيب دة موال، عايز تخليه أغنية مش موال؟ انزل تحت كملقراية..

عندك حلين، الأول هو إنك تديها لمهندس أو شركة تشطيبات وساعتها هتلاقي سعر المتر بيتراوح بين 500 و 900 جنيه يعني من “لوكس” – لـ “هاي لوكس” بس بقى هتدفع 10% زيادة متستغربش دي حاجة اسمها اشراف ، يعني إنك هتشتري دماغك من التعامل مع العمال مقابل 10% دول للشركة او للمهندس بس انسى هموم الدنيا يا صاحبي.

حلو؟

حلو ، نكمل بقى.

الحل التاني ياسيدي إنك تشطبها بنفسك يعني تبني كل حاجة على إيدك من أول الرملة لأخر مسمار هتعلق عليه تابلوه في أوضة الأطفال، وساعتها بقى إنت مش محتاج أكتر من حاجة واحدة ، إنك تركز في الكلام اللي جاي.

أول حاجة بتبدأ بيها لو مستلم شقة على المحارة
اهم حاجه المحاره عشان ترتاج بعد كده ...
والحلوق ودي اسمها في عُرف المقاولين “نص تشطيب” الكهربا والسباكة.

الكهرباء عصب البيت

الكهربا بتكلفك بين 2000 و2500 جنيه مصري فقط لاغير في حالة ان شقتك لا تتعدي مساحتها الصافية 130 متر، أما لو أكبر من كدة بحسب تقدير الكهربائي اللي طبعًا هتفاصل معاه في كل رقم هيقولهولك، مش علشان ممعكش يكمل، إنما علشان تبينله انك مصحصح كدة وعينك في وسط راسك.

الكهربا هتكلفك الرقم اللي فوق دة مصنوعية بس بياخد نصهم في التأسيس والنص التاني لما يجي يشطب وعليك خير، بيكتبلك ورقة فيها الطلبات كلها الورقة دي هي اهم حاجة في الشقة كلها.

ما تستخسرش قرش في الكهرباء بالذات لانها زي ما بيقولوا كدة عصب البيت، ولازم تكون معمولة صح وبخامات نضيفة يعني متصتنصحش وتقول لنفسك هنزل اجيبهم من العتبة هلاقي اسعار كويسة، “الكهرباء خارج نطاق فتاكة المصريين”، ماركة واحدة ومشهور جدا هي مورد الاسلاك في مصر وتقريبا كل الكهربائية بيشتغلوا منها، مكلفة شوية بس مريحة وأمان جدا..حلو ؟ حلو ، تأسيس الكهرباء بياخد تقريبا من 3 لـ 4 أيام.

السباكة مش مجرد مواسير

لو عندك حمامين واحد صغير وواحد كبير والاتنين بيطلوا على المنور يعني تقسيم الشقة حلو كدة ويشرح القلب، فالسباك هياخد منك حوالي 1500 جنيه مصنعية، بياخد نصهم تأسيس ونصهم تشطيب، بيكتبلك ورقة خامات ومواسير وهما 3 ماركات موجودة ومشهورة وجودتهم قريبة من بعض وسعرهم كمان، اسأله تجيب ايه، وبعد ما يركب المواسير ويحط العازل على الارض علشان تسريب الميه، هيكلم الشركة اللي هتيجي تعملك اختبار مجاني للتركيب وتديلك ضمان مدي الحياة “أي ماركة من الثلاثة بتعمل كدة” ولو حصل حاجة في المواسير هما اللي بيشلوها، شغل السباكة هيخلص تقريبا في 3 أو 4 أيام.

بعدها بقى فيه حاجة اسمها “مرمات” ودي اللي بتبقى تكسير في المحارة بسبب تأسيس الكهرباء والسباكة، البَنَا ملوش سعر فيها لانه بيسميها “مرمة” يعني مش شغل هيشتغله بالمتر، فهو اللي بيقدر هياخد كام.

جاء دور السقف

عندك اقتراحين الأول “الجبس العادي” واللي بيسموه المصيص، وبيبقى لونه ابيض وفيه كرانيش، متر المصيص كدة لوحده بيتراوح من 8 جنيه ل 12 جنيه ميزدش عن كدة قرش، ومتر الكرانيش من 20 ل 30 جنيه.

الاقتراح التاني حاجة كدة اسمها جبس on board ، واللي سماها المصريين “جبس امبورد” ودي بتختار الشكل اللي انت عايزه المتر فيه بيبدأ من 85 لـ110 جنيه على حسب صعوبة الرسمة، وانت وشطارتك، الجبس امبورد دة بيكون فيه حاجة اسمها بيت نور وسبوتات اتفق مع بتاع الجبس انك هتعمله علشان يبقى عامل حسابه فيها، بياخد من اسبوع لـ10 أيام.

نخش بقى على التقيل.. النقاشة

أطول وأهم مرحلة، تكاد تكون أهم من الثاوية العامة. مبدئيا متر النقاشة السائد بعشرة جنيه، أوقات تلاقيه 11 أو بـ 12 مبيزدش عن كدة اللي يقولك اكتر من كدة متردش عليه، بيجي النقاش بيشد سكنتين معجون ويمشي بياخد مبلغ كدة عربون يعني، ويقولك خلص السيراميك وكلمني.

تروح انت بقى عايز تجيب السيراميك ودي مرحلة فاصلة في حياة البني آدم لأسباب كتير أولها الرملة، عايز تعرف ليه ؟..أنا أقولك

هل تعلم ان متر الرملة بـ 30 جنيه؟

هل تعلم ان نقل متر الرملة من الشارع للشقة ب 100 جنيه ؟

آه والله زي ما بقولك كدة.

والسيراميك وسط النقاشة

لو شقتك حوالي 130 متر هتحتاج حوالي 25 متر رملة، و2 طن أسمن وشكارة أسمنت أبيض.

فيه في مصر ما لا يقل عن مليون محل سيراميك أشكال وألوان، وفيه محلات مشهورة جدا، أو تنزل الفجالة في يوم كدة تاخد فكرة عن الاسعار والأنواع والمصري والصيني، وهكذا، متروحش محل واحد ادخل عند أكتر من 10 محلات علشان هتلاقي اسعار متفاوتة واشكال حلوة، اللي هينقل السيراميك من المحل لبيتك مش هياخد اقل من 200 جنيه.
نصيحه خليك في الجوهره وكيلوباترا ..
. عشان تطلع السراميك لو انت ف الخامس هتدفع عن الدور من 5 ل 10 جنيه ..

((((((((( وفكك من السراميك الشطرنج عشان مش هيعجب خطيبتك وهتقعد شيلهالك لحد ما تجوز العيال )))))))))).. 

نيجي بقى لدور “المبلط” او فني السيراميك، دة لازم يكون “معلم” مش فني بس، حياتك ومستقبلك بين ايديه، تركيب متر البورسلين بيبقى اغلى من السيراميك العادي وسعر الحيطان غير سعر الارضية، خليك ناصح ووحد السعر في كله وغالبًا بيبدأ بـ 15 جنيه للمتر وبينتهي عد 32 جنيه، بيشتغل فيه على حسب مساحة الشقة ولو شقتك 130 متر هياخد 8 أيام تقريبًا.
نصيحه ماتعملش سيراميك للسقف كلو مش هيبان مع دولاب المطبخ..

تخلص السيراميك وبعدين تكلم النقاش

لازم النقاش يرجع للشقة عشان يشد سكينة معجون تالتة ويسنفر، السنفرة دي يعني يساوي الحيطة ببعضها، وبعدين يبدأ يبطن للون النهائي اللي انت هتختاره، وبعدين هيبقى مش فاضل غير الوش الأخير اللي هو اللون النهائي.

قبل ما بيخلص خالص بتكلم الكهربائي يجي تاني يقفل علب الكهرباء، وهيفتح أماكن للنجف وللسبوتات في السقف، والسباك شرحه هيجي يركب التواليت الأحواض والبانيو لو “شاسية مش بُني” والفرق بينهم ان التاني بيتبني في الحيطة أما دة فبيتحط كدة على السيراميك وبيتقفل”.

شبابيك ألوميتال

انت بقى شباك الحمام والمطبخ ألوميتال اللي فيه منه نوعين اتنين، بي أس المتر فيه بـ550 جنيه والتاني مصري واسمه السعد والمتر منه بـ 400.

وباب خشب لكل غرفة

تجيب أبواب الأوض اللي الباب فيها بيبدأ من 270 وانت طالع، والشائع منه بيبقى خشب موسكي وقشرة أرو، وبيدهن “أستر” دهان الباب الواحد بيكلف 300 جنيه للأسف (( اوسخ صنايعي الاستورجي ذله بالفلوس لو اديته الفلوس مش هتشوفه تاني غير لما الفلوس تخلص ))
، وتجيب مقابض الأبواب من أشهر مكان للحاجات دي اسمه “الرويعي” في الموسكي وهناك فيه تشكيله حلوة جدا.
واسمع مني وفكك من اام الابواب الخشب خليك في الالوميتال او جيب ابواب جاهزه بالأوكر وكلو اوفر وانضف واريح ...

تخلص كل دة وتبلغ النقاش يجي يدي اللون الأخير اللي ات عايزه وينضف الشقة، وأول مسحة للشقة الميه يكون فيها جاز علشان الشحم اللي في السيراميك يطلع، والشحم دة بيتحط علان يمنع تكسيره لما يجي على بعضه، وبردو بيتكسر.
اوعي خطيبتك تشوف ابشقه وهي بتتشطب فكك منها تبقي تشوفها في السبوع ان شاء الله . اصل مش هيبقي ف دماغها اساسا اسمع مني اسال مجرب .. اشطا !!

راجع نفسك يابني واعقل جواز ايه بس خليك فري احسن .. مصمم ؟! خلاص انت حر .. شيل يامعلم
Hazem mady ..