الإسكندرية التاريخ و عبقرية المكان

(( معشوقتى الإسكندرية في سطور ياصديقى !!!)) ***الإسكندرية ليست ميامي وشارع خالد ابن الوليد والقلعة او كوبري ستانلي ،و شوارع محطة الرمل الرئيسية وسان ستيفانو وشاطيء النخيل ،وجبة في البان سويسرا و فول وفلافل محمد احمد او جاد او ابو ربيع . يؤسفني اقولك ان دي مش اسكندريةالحقيقية دي اسكندرية بتاعة السياح اللي بتشوفها في الصور ولكن لكي تحس بإسكندرية الحقيقية وتحس بنبض الناس والشوارع ::: ١-لازم تزور حواري السيالة ،وتمشي في شارع النصر ،وتدخل سوق زنقة الستات ،وغيط العنب وكرموز وعامود السواري، .. وتمشي في شوارع وحواري كوم الدكة ،و تروح اللبان ،وتشرب حجر معسل في قهوة حمودة او واحد قهوة في قهوة ابو صابر في كامب شيزار ،وتشرب قهوة في البن البرازيلي في محطة الرمل ومطاحن البن الاهلية في شارع النبي دانيال ،وقهوة الاسعاف والقهوة الوطنية والتجارية في المنشية ،وتاكل وجبة سمك وجمبري وفواكه بحر عن حودة جندل في الازاريطة او عند شعبان بتاع السمك في المنشية ،وتشتري كتاب من منشاة المعارف او دار المعارف في شارع سعد زغلول ،وتمشي في شارع البوسطة القديمه في المنشية ،وتاكل سندوتش جبنة تركي ،وتشرب كوباية لبن من محل وادي النيل ،وتاكل حتة هريسة او بوريك بالجبنة من العصافيري في محطة مصر ،ولازم تمشي في سوق شيديا وسوق زنانيري وسوق زين العابدين وسوق الميدان وسوق راتب وسوق باكوس ،ولازم تشم ريحة البن والبحر في شارع بور سعيد .. مروحتش طبعا المكس اشتريت سمك وسردين ، وتذهب الى حلقة السمك وتشترى سمك بربون ومرجان وجمبري وكابوريا طازة ،عشان تشوف اسكندرية الحقيقية لازم تمشي في شارع النبي دانيال وتشوف اكشاك الكتب ،وتمشي في شارع فؤاد وتتفرج على اقدم مباني العالم ،و تروح الحضرة والنزهة ومحرم بك تتفرج على ماتبقى من فيلات عريقة كانت لاعرق عائلات الجاليات الأجنبية في اسكندرية، وتمشى في الشوارع الجانبية والحواري والزقايق لتستمع الى اللهجة الاسكندرية ،وتروح هانوفيل وبيطاش العجمى والقباري والورديان ،وتقعد على قهوة خفاجى وتمشى في شارع 45 وشارع القاهرة وغيرهم ٢-ولكى تحس باسكندرية اسال مواطن سكندري عن عنوان عشان يوصفهولك بالتفصيل الممل وممكن يوصلك بنفسه لو فاضي ... كل طبق كشري في المدهش في محطة مصر .. كل سندوتشين كبدة عند عم امين او عند ميسو في الرصافة .... روح اوريكا او مكتبة ابو العز الحريري في بوالينو .. تعالى اسكندرية في الشتا وامشي في شارع فؤاد والدنيا بتشتي متجيش في الزحمة في الصيف . ٣-فيجب أن تعلم أن ::- ١. إسكندرية أقدم من القاهرة باكتر من ١٠٠٠ سنة ، إسكندرية اتبنت فى ٣٣١ قبل الميلاد والقاهرة اتبنت فى ٩٦٩ ميلادى يعنى اكتر من ١٢٠٠ سنة .. ٢. الإسكندر مشافش إسكندرية بعد ما تم الانتهاء منها عشان بعد ما دخل مصر راح يحارب فى أماكن تانية لحد ما مات فى العراق والأسطورة بتقول إنه رجع يتدفن فى إسكندرية .. ٣. إسكندرية عدى عليها يونانيين ، مقدونيين ، رومان (ايطاليين) ، فرس (ايرانيين) ، بيزنطيين (روما الشرقية) ، و عرب من شبه الجزيرة العربية. كل دول حكموا إسكندرية فترات من الزمن و كل فترة أدت للبلد حاجة و أثرت فيها .. ٤. عدد اليونايين فى إسكندرية سنة ١٩١٧ كان حوالى ٥٦ الف نسمة ، دلوقتى عددهم قل لحد حوالى ٤ آلاف نسمة بس و طبعا كلهم مندمجين فى مصر .. ٥. مكتبة الإسكندرية الحالية هو مبنى حديث معمول قريب لكن مكتبة الإسكندرية الحقيقية اتحرقت سنة ٤٨ قبل الميلاد ٦. إسكندرية فيها مدينة كاملة مدفونة تحت المية (هرقليون) و كلها أثار و حاجات من عصر البطالمة و الرومان و للأسف مش كتير بيزورها ، بالمناسبة اللوجو بتاع الدورى الإنجليزى متاخد من تمثال تحت الميا هناك .. ٧. زمان إسكندرية كانت متقسمة ٣ حتت ، جزء لليونانيين و جزء للمصريين و جزء لليهود ، الجزء إللى كان عايش فيه المصريين كان قرية راقودة إللى هو دلوقتى إسمه كوم الدكة .. ٨. اخيرا بقى ، إسكندرية مصر هى واحدة من اكتر من ٥٠ مدينة إسمها إسكندرية برضو حوالين العالم وموجودين في كندا و البرازيل و إيطاليا و رومانيا و تركيا و روسيا وغيرهم لكن أشهرهم على الاطلاق إسكندرية بتاعتنا ..عاوزين تعرفوا اسكندرية ليه كانت خواجاتى و اهل اسكندرية٠ (منقول)